Ein rhwydweithiau staff

Embrace yw rhwydwaith staff amrywiaeth ethnig Ofgem. Ein nod yw creu diwylliant yn y gweithle lle mae hil ac ethnigrwydd yn cael eu deall a'u cynnwys yn ein harferion yn y gweithle. Rydym yn cefnogi pob aelod o staff.

Ein nod yw:

• galluogi sgyrsiau agored ac anfeirniadol am hil ac ethnigrwydd
• deall y ffactorau sy'n ysgogi gwahaniaethau mewn canlyniadau a chyfleoedd ar draws hil ac ethnigrwydd, creu ymwybyddiaeth ohonynt a mynd i'r afael â nhw
• dileu rhwystrau sefydliadol a all roi staff dan anfantais oherwydd eu hil neu eu hethnigrwydd
• grymuso staff i fod yn nhw eu hunain yn y gwaith; fel bod pobl yn teimlo eu bod yn cael eu cynnwys, yn hapus, yn cael eu cefnogi a'u hannog i ragori yn y gweithle.

Rydym yn cydweithio'n agos ag arweinwyr Ofgem a staff ar draws pob gradd i godi ymwybyddiaeth o faterion amrywiaeth ethnig ac i nodi camau gweithredu a all arwain at newid gwirioneddol. Gwnawn hyn drwy:

• rwydweithiau ar draws y llywodraeth a thrwy weithdai a seminarau staff
• canolfan gyngor ac adnoddau ar fewnrwyd Ofgem
• cynnig clust i wrando a rhoi cyngor i staff.

Mae EnAble ar gyfer unrhyw aelod o staff sydd ag anabledd, cyflwr iechyd neu sy'n gofalu am rywun fel gofalwr. Mae hyn yn cynnwys cyflyrau iechyd meddwl a chyflyrau ‘cudd’. Bydd aelodau'r rhwydwaith yn ymuno ag EnAble am sawl rheswm gwahanol. Mae sawl un ohonom yn rhieni i blant ag anableddau neu anghenion ychwanegol.

Ein nod yw darparu rhwydwaith cefnogol o gydweithwyr a ffrindiau i drafod materion cyffredin, a chodi ymwybyddiaeth o faterion a wynebir gan gydweithwyr i wella ein profiad yn y gweithle a hyrwyddo lles meddwl.

Ymhlith y gwaith a wnaed gennym yn ddiweddar mae:

• cyflwyno mwy o gymorth i ofalwyr yn Ofgem – er enghraifft, Pasbort Gofalwyr y Gwasanaeth Sifil.
• gweithio gyda thîm adnoddau dynol Ofgem i archwilio ein hachrediad Hyderus o ran Anabledd a nodi meysydd i'w gwella. 
• cyfrannu at raglen Dyfodol Gwaith Ofgem i sicrhau bod trefniadau gwaith Ofgem yn addas i bawb.

Mae ein haelodau hefyd yn rhan o nifer o fentrau ehangach y Gwasanaeth Sifil ac yn gweithio'n agos â rhwydweithiau eraill, fel Rhwydwaith Iechyd Meddwl Ofgem.

Cawn ein harwain gan staff ac rydym yn dibynnu ar wirfoddolwyr. Rydym yn croesawu pob un o'n cydweithwyr yn Ofgem sydd â diddordeb yn y materion hyn ac sy'n awyddus i wneud Ofgem yn lle gwell i weithio ynddo. 

Mae pobl LGBTQ+ yn haeddu cael gweithio mewn sefydliad sy'n eu grymuso i fod yn nhw eu hunain, p'un a fyddant yn dewis bod ‘allan’ yn y swyddfa ai peidio.

Ymysg ein hamcanion, ein nod yw codi ymwybyddiaeth o faterion a heriau LGBTQ+ benodol, adeiladu corff o gefnogwyr staff hyddysg i gefnogi cydweithwyr LGBTQ+ mewn amgylchedd cynhwysol yn Ofgem, a sicrhau y caiff dull gweithredu dim goddefiant ei fabwysiadu at fwlio ac aflonyddu, a mwy.

Rydym yn cynnig:

• rhwydwaith i gydweithwyr a siaradwyr/digwyddiadau cymdeithasol i sicrhau bod pynciau LGBTQ+ yn weladwy, a lle y caiff materion sy'n gysylltiedig â'r gymuned LGBTQ+ (yn y sefydliad neu'r tu hwnt) eu trafod yn agored.
• mewnbwn ar ddatblygu polisïau mewnol a llywio ymrwymiadau cadarnhaol i ddatblygu arferion cynhwysol, fel Addewid Power in Pride Ofgem.
• lle diogel i bob aelod o staff godi awgrymiadau, pryderon, neu gael help ar faterion LGBTQ+ os bydd angen cymorth arnynt. 

Mae ein grŵp iechyd meddwl yn rhwydwaith o staff Ofgem sy'n frwdfrydig ynghylch hyrwyddo a hwyluso iechyd meddwl da yn y gweithle ac yn y cartref.

Rydym yn cynnig clust i wrando a help i staff y gall fod angen cymorth ychwanegol arnynt a gofal i ymdopi ag iechyd meddwl gwael. Ein nod yw normaleiddio sgyrsiau am iechyd meddwl yn Ofgem er mwyn sicrhau ei fod yn eitem naturiol ar yr agenda mewn cyfarfodydd ar bob lefel, ac yn cael ei drafod mewn cyfarfodydd unigol pan fydd angen.

Rydym yn cynnig:

• cymorth uniongyrchol drwy rwydwaith wedi'i ehangu o swyddogion cymorth cyntaf iechyd meddwl yn Ofgem
• rhwydwaith o hyrwyddwyr lleol yn llawer o'r timau ym mhob rhan o Ofgem i hyrwyddo iechyd meddwl da ar lefel tîm
• canolfan gyngor ar fewnrwyd Ofgem a gohebiaeth fewnol reolaidd ar faterion iechyd meddwl er mwyn annog hunanofal ac arferion gorau o ran iechyd meddwl
• cysylltiad agos â thimau adnoddau dynol Ofgem i annog a llywio gwelliannau i gydweithwyr sydd ag iechyd meddwl gwael. 

Nod Rhwydwaith Menywod Ofgem yw hyrwyddo cydraddoldeb rhywiol yn ein gweithle ac ar draws y sector ynni.

Fel rhwydwaith, rydym yn canolbwyntio ar bum amcan:

1. Cydnabyddiaeth gyfartal i staff ni waeth beth fo'u rhywedd.
2. Proses effeithiol a chefnogol o ran absenoldeb rhiant.
3. Cynrychiolaeth gyfartal o staff benywaidd a gwrywaidd ar baneli mewn digwyddiadau mewnol ac allanol.
4. Hyrwyddo focws ar gydraddoldeb rhywiol ymysg y cyrff a reoleiddir gan Ofgem.
5. Gwneud y gwaith o fonitro a gwerthuso amrywiaeth yn Ofgem yn haws ac yn fwy cadarn.

Hyd yma, rydym wedi gweithio i gyflawni'r amcanion hyn drwy:

• redeg cynllun cyfeillio i rieni newydd
• cynnal digwyddiadau rhyngadrannol ar y cyd ar brofiadau cydweithwyr traws yn y gweithle
• gweithio gyda'n timau adnoddau dynol i dreialu hyfforddiant ar gam-drin domestig i reolwyr llinell
• gwneud addewid cyhoeddus gyda POWERful Women i weithio tuag at gyflawni cynrychiolaeth o 50% o fenywod ar bob gradd yn Ofgem erbyn 2025, gydag o leiaf 9% o'r staff ar bob gradd yn fenywod o leiafrif ethnig.

Mae llawer mwy rydym am ei wneud. Rydym yn croesawu holl gydweithwyr Ofgem i'r rhwydwaith, ni waeth beth fo'u rhywedd.