Cael ynni os ydych yn symud tŷ neu adeilad busnes

Cyn i chi symud i mewn i'ch cartref neu adeilad busnes newydd, efallai y bydd angen i chi gysylltu â chyflenwad nwy neu drydan.

Os bydd gan yr eiddo gyflenwad ynni, gallwch ddilyn y camau hyn i ddod o hyd i'ch cyflenwr ynni. 

Os bydd gan yr eiddo fesurydd rhagdalu, darllenwch ein canllawiau i ddefnyddwyr ar fesuryddion rhagdalu.

Symud i gartref newydd

Gallwch ddewis tariff newydd gyda chyflenwr presennol yr eiddo ar ôl i chi symud i mewn. Gallwch hefyd newid i gyflenwr newydd.

Symud i eiddo rhent newydd

Edrychwch ar eich cytundeb rhentu neu gofynnwch i'ch landlord er mwyn cael gwybod pwy yw eich cyflenwr, a phwy sy'n talu'r biliau ynni ar gyfer yr eiddo.

Os bydd yn rhaid i chi dalu eich biliau ynni, gallwch ddewis newid eich cyflenwr a'ch tariff ar gyfer yr eiddo ar unrhyw adeg.

Os mai eich landlord sy'n talu, dylai wneud y canlynol:

• cynnwys cost yr ynni y byddwch yn ei ddefnyddio yn eich rhent  
• delio â'r cyflenwr ynni yn uniongyrchol
• talu am y cyflenwad ynni i'r eiddo rhwng tenantiaethau.

Edrychwch ar ganllawiau Cyngor ar Bopeth am beth y gall eich landlord ei godi am eich ynni.

Cyn newid eich cyflenwr, dylech gadarnhau'r canlynol:

• a yw eich cytundeb rhentu yn cynnwys rhestr o gyflenwyr y gallwch ddewis ohonynt, a elwir yn ‘gymal cyflenwr diofyn’
• a ellir newid y rhestr o gyflenwyr yn eich cytundeb rhentu
• a oes angen i chi roi gwybod i'ch asiant gosod neu'ch landlord eich bod am newid cyflenwr
• a yw eich cytundeb rhentu yn cynnwys cymal hysbysu a dychwelyd, sy'n golygu y bydd angen i chi newid y cyflenwad ynni yn ei ôl pan ddaw eich tenantiaeth i ben.

Symud eich busnes i safle newydd

Cyn symud i safle busnes newydd, dylech wneud y canlynol: 

• cadarnhau telerau ac amodau eich contract ynni busnes presennol
• gweld a yw'ch cyfrif ynni cyfredol mewn credyd neu mewn dyled
• cadarnhau a gaiff costau ynni eu cynnwys yn eich cytundeb tenantiaeth
• rhoi gwybod i'ch eich hen gyflenwr ynni eich bod yn symud

Efallai y bydd angen i chi ddewis a threfnu contract ynni busnes newydd â chyflenwr ar gyfer eich safle newydd. Dylech gadarnhau a allwch wneud hyn cyn i chi symud i'r safle newydd. Fel arall, gallwch wneud hyn unrhyw bryd ar ôl symud.

Chi sy'n gyfrifol am unrhyw ynni y byddwch yn ei ddefnyddio yn ystod y cyfnod cyn i'ch contract newydd ddechrau. Os byddwch yn defnyddio ynni yn y cyfnod hwn, gallai eich cyflenwr eich gosod ar gontract cyfradd dybiedig. Mae hyn yn golygu y gallai'r cyfraddau rydych yn eu talu gynyddu neu ostwng.

Cofiwch fod yn ymwybodol bod rhai mesurau diogelu gwahanol yn gymwys i ddefnyddwyr ynni domestig, er enghraifft pan fyddant yn cael cymorth gan gyfryngwyr trydydd parti (TPIs). 

Newid i gyflenwr ynni busnes newydd

Ni fydd y rhan fwyaf o gyflenwyr ynni yn caniatáu i chi newid cyn diwedd eich contract. 

Dilynwch y camau hyn i weld pryd a sut y gallwch newid cyflenwyr ynni busnes.