Dwyn ynni ac ymyrryd â mesuryddion

Mae rhai pobl yn ceisio talu llai am eu nwy a'u trydan drwy ymyrryd â'u mesuryddion. Gelwir hyn yn 'dwyn ynni'.

Mae ymyrryd â mesurydd yn anghyfreithlon ac yn beryglus. Gall achosi difrod i'r eiddo, anaf, neu farwolaeth.

Mae dwyn ynni hefyd yn costio mwy na £1.4 biliwn y flwyddyn i ddefnyddwyr ynni ym Mhrydain Fawr (Cymru, Lloegr a'r Alban).

Rhoi gwybod am achosion o ddwyn ynni 

Os byddwch yn gweld arwyddion o ymyrryd â mesurydd, dylech roi gwybod amdano. 

Pan fyddwch yn rhoi gwybod am achos o ddwyn ynni, gallwch aros yn gwbl ddienw.

Gallwch roi gwybod am achosion o ddwyn ynni ar-lein drwy Stay Energy Safe neu drwy ffonio 0800 023 2777.

Sut i nodi achosion o ymyrryd â mesurydd

Byddwch yn wyliadwrus os bydd pobl yn cynnig lleihau eich biliau ynni drwy wneud newidiadau i'ch mesurydd.

Mae yna rai arwyddion cyffredin o ymyrryd â mesurydd i gadw golwg amdanynt.

Arwyddion o ymyrryd â mesurydd nwy

Mae arwyddion cyffredin o ymyrryd â mesurydd nwy yn cynnwys:

  • pibellau sy'n ymddangos yn anghydnaws
  • deialau sydd ddim yn symud neu sydd ddim yn weladwy
  • cyflenwad nwy heb gredyd ar fesuryddion rhagdalu
  • mesurydd wedi'i osod o chwith heb fod modd gweld unrhyw ddeialau 
  • arogl nwy wrth y bocs mesurydd
  • pibellau rwber a ddylai fod yn fetelaidd

Arwyddion o ymyrryd â mesurydd trydan

Mae arwyddion cyffredin o ymyrryd â mesurydd trydan yn cynnwys:

  • gwifrau allan, wedi'u lapio o amgylch neu wedi'u hychwanegu â chlipiau
  • casin sydd wedi'i ddifrodi
  • cyflenwad trydan heb gredyd ar fesuryddion rhagdalu
  • arogl llosgi
  • mwg neu wreichion wrth y mesurydd

Ymyrryd â mesurydd mewn mannau cyhoeddus

Efallai y byddwch yn dod ar draws achos o ymyrryd â mesurydd mewn mannau cyhoeddus yn ogystal â chartrefi pobl. Er enghraifft, mewn neuaddau cymunedol, caffis a thafarndai.

Os byddwch yn sylwi ar gownteri, drysau neu switsys golau yn tanio, gallai hyn fod yn arwydd o fesurydd yn cael ei addasu.

Os bydd eich cyflogwr yn cloi'r cwpwrdd mesurydd neu'n gwrthod mynediad at y mesurydd, gallai hyn hefyd fod yn arwydd o ymyrryd â mesurydd.

Risgiau ymyrryd â mesurydd

Gall ymyrryd â mesurydd arwain at nifer o broblemau a all achosi difrod i eiddo, anaf neu farwolaeth.

Gall ymyrryd â mesurydd nwy achosi:

  • gollyngiadau nwy
  • problemau anadlu
  • colli ymwybyddiaeth
  • tân mewn cartref
  • cyfarpar yn y cartref neu switsys golau yn ffrwydro

Gall ymyrryd â mesurydd trydan achosi:

  • mesurydd yn gorboethi
  • diffygion mesurydd
  • sioc a llosgi
  • lladd â thrydan
  • tân mewn cartref

Beth sy'n digwydd os byddwch yn cael eich dal

Mae dwyn ynni yn drosedd ddifrifol â goblygiadau difrifol. Mae cosbau yn cynnwys dirwyon a hyd at 5 mlynedd yn y carchar.