Arbedwch arian ar eich bil ynni
Arbedwch ar eich biliau drwy ddilyn y camau bob dydd hyn a'r gwelliannau hyn i'r cartref
Gallwch leihau eich biliau nwy a thrydan drwy ddefnyddio llai o ynni a gwneud eich cartref yn fwy ynni effeithlon. Mae'r swm y gallwch ei arbed yn dibynnu ar y math o dŷ rydych yn byw ynddo, y cyfarpar a'r systemau sydd gennych yn eich cartref a sut rydych yn eu defnyddio.
Camau bob dydd
Dechreuwch arbed ynni ar unwaith gyda'r newidiadau cyflym hyn.
Gostwng tymheredd y boeler
Os oes gennych foeler cyfunol, bydd gostwng tymheredd y dŵr a anfonir i'r rheiddiaduron a'r tanc dŵr poeth yn lleihau'r gost i'w redeg.
Gwnewch yr Her Arbed Arian Boeleri.
Gostwng tymheredd y gwres canolog
Gallwch ddefnyddio llai o ynni i gynhesu eich cartref drwy ostwng tymheredd eich thermostat a throi eich rheiddiaduron i lawr pan na fydd yr ystafell yn cael ei defnyddio.
Gwyliwch y fideo hwn gan yr Ymddiriedolaeth Arbed Ynni ar sut i ddefnyddio eich thermostats.
Gosod eich peiriant golchi i 30°C
Mae peiriannau golchi a glanedyddion dillad modern yn golchi dillad ar dymheredd is. Arbedwch ynni drwy osod eich peiriant golchi i 30°C, rhoi llwyth llawn yn eich peiriant a defnyddio cylch golchi byrrach.
Cau'r llenni yn y nos
Mae cau'r llenni yn y nos yn atal aer cynnes rhag dianc o'ch cartref drwy'r ffenestri. Mae hyn yn helpu i arbed arian ar filiau gwres.
Gwelliannau bach i'r cartref
Gwelliannau syml y gallwch eu gwneud i'ch cartref er mwyn arbed ynni.
Defnyddio bylbiau golau sy'n arbed ynni
Yn ôl Ymddiriedolaeth Arbed Ynni, mae newid hen fylbiau i olau LED arbed ynni yn gallu arbed hyd at £4 y bwlb y flwyddyn.
Gallwch gael cyngor ar fylbiau arbed ynni ar wefan yr Ymddiriedolaeth Arbed Ynni.
Atal gwres rhag dianc o'ch cartref
Llenwi bylchau o amgylch y ffenestri a drysau er mwyn atal aer oer rhag dod i mewn ac atal aer cynnes rhag dianc. Sicrhewch nad ydych yn rhwystro sianeli awyru, fel awyrellau waliau neu ffenestri.
Rhoi ffilm ffenestr ar ffenestri gwydro sengl
Pan nad yw newid y ffenestri gwydro-sengl yn opsiwn, mae ffilm ffenestri o gymorth i gadw gwres mewn ac i arbed arian ar eich bil ynni.
Dysgwch fwy am osod haen wydro arall ar wefan canolfan Ynni Cynaliadwy.
Insiwleiddio eich tanc dŵr poeth
Gall inswleiddio’r tanc dŵr poeth atal gwres rhag cael ei golli, sy'n arbed ynni. Gallwch brynu 'siaced silindr dŵr poeth' mewn siopau nwyddau metel neu ar-lein.
Darllenwch fwy am insiwleiddio tanciau dŵr poeth ar wefan yr Ymddiriedolaeth Arbed Ynni.
Gosod thermostat clyfar a rheolyddion gwresogi
Gyda thermostat clyfar a rheolyddion gwresogi, gallwch drefnu i'r gwres a'r dŵr poeth ddod ymlaen pan fydd eu hangen yn unig, fydd yn arbed arian ar eich biliau ynni.
Mae mwy o gyngor am reolyddion gwresogi clyfar ar wefan yr Ymddiriedolaeth Arbed Ynni.
Gosod mesurydd deallus
Mae mesurydd deallus yn dangos faint o ynni rydych yn ei ddefnyddio, a all eich helpu i ddefnyddio ynni yn fwy effeithlon. Gall eich cyflenwr ynni osod mesurydd deallus am ddim.
Gwelliannau mwy i'r cartref
Gallwch arbed ynni yn yr hirdymor gyda phrosiectau mwy i wella'r cartref.
Prynu cyfarpar sy'n ynni effeithlon
Mae gan bob cyfarpar trydanol sgôr ynni. Mae sgôr o 'A' yn golygu'r mwyaf ynni effeithlon, a sgôr o 'G' yn golygu'r lleiaf ynni effeithlon. Mae cyfarpar â sgôr ynni da yn costio llai i'w gynnal.
Darllenwch fwy am sut i ddewis cyfarpar ynni effeithlon ar wefan yr Ymddiriedolaeth Arbed Ynni.
Gosod ffenestri gwydro dwbl
Newid ffenestri gwydro sengl i leihau'r gwres a gollir ac i arbed ar filiau gwres.
Darllenwch am ffenestri a drysau ynni effeithlon ar wefan yr Ymddiriedolaeth Arbed Ynni.
Inswleiddio eich cartref
Inswleiddio’r cartref yw un o'r ffyrdd gorau o gadw eich cartref yn gynnes ac arbed ynni. Gall newidiadau bach wneud gwahaniaeth. Er enghraifft, rhoi deunydd insiwleiddio y tu ôl i reiddiaduron.
Dysgwch fwy am atal gwres rhag cael ei golli yn eich cartref ar wefan yr Ymddiriedolaeth Arbed Ynni.
Cael cymorth o ran effeithlonrwydd ynni a biliau ynni
Defnyddio eich Tystysgrif Perfformiad Ynni
Mae eich Tystysgrif Perfformiad Ynni yn dangos:
- pa mor ynni effeithlon yw eich cartref
- beth allwch chi ei wneud er mwyn gwneud eich cartref yn fwy ynni effeithlon
- faint o arian y gallech ei arbed
Dod o hyd i'ch tystysgrif ynni ar GOV.UK.
Dod o hyd i grantiau ynni
Mae gan y Llywodraeth gynlluniau 'Help to Heat' i sicrhau bod cartrefi yn gynhesach ac yn rhatach i'w cynhesu.
Dod o hyd i grantiau ynni i'ch cartref ar GOV.UK.
Cael help gyda biliau ynni
Gwybodaeth am ble i gael help os ydych yn poeni am dalu eich biliau trydan neu nwy.